6.எளியமுறை தமிழ் இலக்கணம்

எளியமுறை இலக்கணம் - 06.

🎡 👀 🎡 👀 🎡 👀 🎡 👀 🎡 👀 

இனிய  வணக்கம்.

 #திணைகளைப் பற்றிக் காண்போம்.

சொற்களில் இரு திணைகள் உண்டு.

ஒன்று #உயர்திணை.

இதில் மக்கள், தேவர், நரகர் ஆகியோர் அடங்குவர்.

மற்றொன்று #அஃறிணை.

மக்கள், தேவர், நரகர் ஆகியோரைத் தவிர்த்து உலகில் இருக்கும் உயிர் உள்ளவை, உயிர் அற்றவை யாவும் அஃறிணை எனப்படும்.

அடுத்தது பால்.

- - - - - - - - - - - - - -

ஆவின் பால், ஆரோக்யா பால், அமலா பால், அப்பு பால் என்றோ, பொருட்பால், அறத்துப் பால், இன்பத்துப் பால் என்றோ நினைத்துக் கொள்ளக் கூடாது.

இது வேறு #பால். இந்தப் பால் #உயர்திணை மற்றும் #அஃறிணையைக் குறிக்க மட்டுமே பயன்படும் பால் ஆகும்.

#ஆண்பால், #பெண்பால், #பலர்பால் ஆகிய மூன்று பால்களும் உயர்திணை ஆகும்.

அவன், அவள், அவர், அவர்கள் போன்றவை.

#ஒன்றன்பால், #பலவின்பால் ஆகிய இரண்டு பால்களும் அஃறிணை ஆகும்.

அது, இது, எது, அவை, இவை, எவை போன்றவை.

அதற்கடுத்து எண்ணிக்கை.

- - - - - - - - - - - - - - - - - - - - - - - - -

ஒன்று என்கிற எண்ணைக் குறிப்பது #ஒருமை ஆகும்.

இரண்டும் இரண்டுக்கு மேற்பட்ட அனைத்தும் #பன்மை ஆகும்.

இவற்றைப் பின்வருமாறு காட்டலாம்.

கந்தன் வந்தான் - உயர்திணை. ஆண்பால். ஒருமை.

மங்கை வந்தாள் - உயர்திணை. பெண்பால். ஒருமை.

தேவர்கள் வந்தனர் - உயர்திணை. பலர்பால். பன்மை.

குதிரை ஓடியது - அஃறிணை, ஒன்றன்பால், ஒருமை.

குதிரைகள் ஓடியது - என எழுதக் கூடாது. #ஓடின என்பதே சரி.

பூக்கள் மலர்ந்தன - அஃறிணை, பலவின்பால், பன்மை.

பூ மலர்ந்தன - என எழுதக் கூடாது. #மலர்ந்தது என்பதே சரி.

ஒருமை, பன்மையை வினைச் சொற்களும் வித்தியாசப் படுத்திக் காட்டும்.

அடுத்தது இடம்.

- - - - - - - - - - - - - -

இடம் மூன்று வகைப் படும். அவை, தன்மை, முன்னிலை, படர்க்கை என்பன.

01. #தன்மை:

பேசுகிறவர் தன்னைக் குறிப்பிட்டுக் கொள்வது #தன்மை ஆகும்.

இதிலும் ஒருமை, பன்மை உண்டு.

உ - ம்:

நான் - ஒருமை, நாம், நாங்கள் - பன்மை

02. #முன்னிலை:

பேசுகிறவர் தன் முன்னால் நிற்பவரைக் குறிப்பிடுவது முன்னிலை ஆகும்.

இதிலும் ஒருமை, பன்மை உண்டு.

உ - ம்:

நீ - ஒருமை, நீங்கள் - பன்மை,

நீர் - இலக்கணப் படி பன்மையாகவே கருதப் படுகிறது.

எனினும், பேச்சு வழக்கில்

நீர் - இது ஒருமைக்கும், பன்மைக்கும் இடைப் பட்ட ஒன்றாகக் கருதப் படுகிறது. சரியாகச் சொல்வதென்றால் சற்றே மரியாதைக் குறைவான பன்மையாகத் தற்காலத்தில் எண்ணப் படுகிறது.

திருநெல்வேலித் தமிழில், ‘’நீர், ஓய்…’’ போன்ற சொற்கள் பிரபலம்.

பாஞ்சாலங்குறிச்சி மன்னனான வீரபாண்டிய கட்டபொம்மனை, #நீர் தான் வீரபாண்டிய கட்டபொம்மன் என்பவரோ…?’’ என்று ஜாக்ஸன் துரை கேட்டதாக வரலாறு உண்டு.

03. #படர்க்கை:

பேசுகிறவர் தன்னையோ, தன் முன்னால் உள்ளவரையோ குறிப்பிடாமல் அருகில் அல்லது தொலைவில் உள்ளவரைக் குறிப்பிடுவது படர்க்கை ஆகும்.

உ - ம்: 

இவன், இவள், இவர்கள், இது, இவை. அவன், அவள், அவர்கள், அது, அவை போன்றவை.

இவை எல்லாம் உங்களுக்குத் தெரிந்தவை தான். இதுவரை நான் உங்களுடன் பகிர்ந்து கொண்டவை #ஒரு_நினைவூட்டல்_தான்.

அஸ்திவாரம் முடிந்தது. இனிமேல் தான் கவிதை, உரைநடை போன்றவற்றை எழுதத் தேவையான இலக்கணத்தைப் படிக்கப் போகிறோம்.

நகைச்சுவை நடிகர் வடிவேலு Building strong. Basement weak என்று சொல்வதைப் போல 

#Basement(#இலக்கணம்) #weak ஆக இருந்தால் #Building(#கவிதை) #strong ஆக இருக்காது.

கவிதைகளின், குறிப்பாக மரபுக் கவிதைகளின் Basement - அஸ்திவாரமே இலக்கணம் தான்.

இன்றைக்கு மரபுக் கவிதை எழுதுபவர்கள் வெகு குறைவு. அதிலும், கவித்துவத்துடன் எழுதுபவர்கள் வெகுவெகுக் குறைவு.

புதுக் கவிதைகள் பற்றி எந்தக் கருத்தும் சொல்ல விரும்பவில்லை.

அவற்றுக்குமான இலக்கணத்தைத் தனியாக எழுதலாம் என்று இருக்கிறேன்.