1.வெண்பா இலக்கணம் (அகன்)

 வெண்பா இலக்கணம் -  01.

தனித்த, தூய இலக்கணம் கொண்டது வெண்பா.

அதனால் தான் வெண்பா #வெள்ளைப்பா, #ஒண்பா, #கன்னிப்பா மற்றும் #கற்புப்_பா என்றெல்லாம் அழைக்கப் படுகிறது.

எந்த வகை மரபுக் கவிதை எழுதுவதாக இருந்தாலும், முதலில் நாம் அறிந்து கொள்ள வேண்டியது எழுத்து, அசை, சீர், தளை, அடி மற்றும் தொடை எனும் ஆறு அதிகாரங்களையும் தான்.

நாம் அனைவருமே - எழுத்து பற்றி அறிவோம்.

நாம் அறிந்து கொள்ள வேண்டியது மற்ற ஐந்தைப் பற்றித் தான்.

இங்கு, வெண்பாவுக்கு உரித்தான அசை, சீர், தளை, அடி மற்றும் தொடை அதிகாரங்களை மட்டும் சுருக்கமாகக் காண்போம்.

#அசை

- - - - - - -

எழுத்துகள் ஒன்று சேர்ந்து அசைவதால் அவை அசைகளாக வருகின்றன.

அவை, 01.  நேர் அசை, 02. நிரை அசை என்று இரண்டு வகைப் படும்.

01. #நேர்_அசை.

- - - - - - - - - - - - - -

#ஒருகுறில்எழுத்து அல்லது #நெடில்_எழுத்து, தனியாகவோ மெய் எழுத்துடன் சேர்ந்தோ வருவது நேர் அசை எனப்படும்.

க, கல் - தனிக் குறில் அல்லது குறில் + ஒற்றெழுத்து - நேரசை ஆகும்.

தா, வேல் - தனி நெடில் அல்லது நெடில் ஒற்றெழுத்து - நேரசை ஆகும்.

சில இடங்களில் குறில், அல்லது நெடில் எழுத்தை அடுத்து இரண்டு ஒற்றெழுத்துகள் வருவதும் உண்டு. 

கம'ழ்ந்'தது - பா'ர்த்'தேன்.

02. #நிரை_அசை.

- - - - - - - - - - - - - - - -

#குறில், #நெடில் ஆகிய இரண்டும் சேர்ந்து வருவதும் #இரண்டுகுறில்எழுத்துகள் சேர்ந்து வருவதும் நிரை அசை ஆகும்.

இவற்றுக்குப் பின் மெய் எழுத்து வந்தாலும் நிரை அசை ஆகும்.

படு - இரண்டு குறில் எழுத்துகள். இதனை குறிலிணை என்றும் சொல்வர் - நிரை அசை.

படும் - இரண்டு குறில் எழுத்துகள் + ஒற்றெழுத்து - நிரை அசை.

படா - குறில் நெடில் எழுத்துகள் - நிரை அசை.

படாம் - குறில் நெடில் + ஒற்றெழுத்து - நிரை அசை.

இனி, சீர் வாய்பாடைப் பார்ப்போம்.

.- - - - - - - - - - - - - - - - - - - - - - - - - - - - - - - -

நேர் நேர் - தேமா.

நிரை நேர் - புளிமா

இவை இரண்டும் #மாச்_சீர் எனப் படும்.

நேர் நிரை - கூவிளம்.

நிரை நிரை - கருவிளம்

இவை இரண்டும் #விளஞ்_சீர் எனப் படும்.

மாச் சீரும், விளஞ்சீரும் ஆகிய நான்கு சீர்களும்  #இயற்சீர் எனப் படும்.

இனி, #சீர்கள் பற்றி பார்ப்போம்.

- - - - - - - - - - - - - - - - - - - - - - - - - - - - -

நமது ஆய்வுக்கு ஒரு திருக்குறளை எடுத்துக் கொள்வோம்.

(1)கற்க - (2)கசடறக் - (3)கற்பவை - (4)கற்றபின்

(5)நிற்க - (6)அதற்குத் - (7)தக.

இரண்டு அடிகள் ஏழு சீர்களால் ஆன இந்தத் திருக்குறளை ஆய்வோம்.

இந்தத் திருக்குறளில் உள்ள #கற்க, #நிற்க எனும் இரண்டு சீர்களைப் பார்ப்போம்.

(1)கற்க - எனும் சீரில் ஒற்றெழுத்துக்கு முன்னும் பின்னும் குறில் எழுத்து வந்துள்ளது.

(5)நிற்க - எனும் சீரில் ஒற்றெழுத்துக்கு முன்னும் பின்னும் குறில் எழுத்து வந்துள்ளது.

இவற்றை அசை பிரிப்போம்.

கற்/ க - நேர் நேர் அசை. இதனைத் #தேமா என்பர்.

நிற்/ க - நேர் நேர் அசை. இதனைத் #தேமா_என்பர்.

அடுத்து, #அதற்கு எனும் சீரை அசை பிரிப்போம்.

(6)அதற்/ கு - நிரை நேர் அசை. இதனைப் #புளிமா என்பர்.

அடுத்து, #கற்பவை, #கற்றபின் எனும் சீர்களை அசை பிரிப்போம்.

(3)கற்/ பவை - நேர் நிரை அசை. இதனைக் #கூவிளம் என்பர்.

(4)கற்/ றபின் - நேர் நிரை அசை. இதனைக் #கூவிளம்_என்பர்.

அடுத்து, #கசடற எனும் சீரை அசை பிரிப்போம்.

(2)கச/ டற - நிரை நிரை அசை. இதனை #கருவிளம் என்பர்.

அடுத்து, தக எனும் சீரைப் பார்ப்போம். இது ஓரசைச் சீர்.

(7)தக - நிரை, ஓரசைச் சீர். வெண்பாவில் இதனை #மலர் என்பர்.

மாச் சீர் (தேமா, புளிமா) இரண்டும்,

விளஞ் சீர்(கூவிளம், கருவிளம்) இரண்டும் புரிகிறதா….

இந்தத் திருக்குறள்

தேமா - கருவிளம் - கூவிளம் - கூவிளம்

தேமா - புளிமா - மலர்

எனும் வாய்பாடில் அமைந்துள்ளது.

அடுத்து, #காய்ச்_சீர்கள் நான்கினைக் கண்போம். காய்ச் சீர்களை #வெண்சீர் என்று அழைப்பர்.

தேமா, புளிமா, கூவிளம் மற்றும் கருவிளம் 

சீர்களுடன் ஒரு நேர் அசையைச் சேர்க்க வரும் நான்கு சீர்களும் காய்ச் சீர்கள் எனப் படும்.

நேர் நேர் - தேமா + நேர் = தேமாங்காய்.

நேர் நேர் நேர் - தேமாங்காய்.

நிரை நேர் - புளிமா + நேர் = புளிமாங்காய்.

நிரை நேர் நேர் - புளிமாங்காய்.

நேர் நிரை - கூவிளம் + நேர் = கூவிளங்காய்.

நேர் நிரை நேர் - கூவிளங்காய்.

நிரை நிரை - கருவிளம் + நேர் = கருவிளங்காய்.

நிரை நிரை நேர் - கருவிளங்காய்.

(1)தெய்வத்தான் - (2)ஆகா - (3)தெனினும் - (4)முயற்சிதன்

(5)மெய்வருத்தக் - (6)கூலி - (7)தரும்.

இந்த ஆறு சீர்களுடன் ஈற்றுச் சீரான ஏழாவது சீர் #நாள், #மலர், #காசுமற்றும்பிறப்பு எனும் நான்கு சீர்களில் மட்டுமே நிறைவு பெற வேண்டும்.

இந்தத் திருக்குறளை உங்களுக்குக் கற்பிப்பதற்காக கொஞ்சம் மாற்றிச் சீர் பிரித்திருக்கிறேன்.

(1)தெய்வத்தான் - (2)ஆகா - (3)தெனினும்மு - (4)யற்சிதன்

(5)மெய்வருத்தக் - (6)கூலி - (7)தரும்.

(2)ஆ/ கா - (6)கூ/ லி - நேர் நேர் - தேமா

(4)யற்/ சிதன் - நேர் நிரை - கூவிளம்.

(7)தரும் - நிரை - ஓரசைச் சீர் - மலர்.

(1)தெய்/ வத்/ தான் - நேர் நேர் நேர் - தேமாங்காய்.

(3)தெனி/ னும்/ மு - நிரை நேர் நேர் - புளிமாங்காய்.

(5)மெய்/ வருத்/ தக் - நேர் நிரை நேர் - கூவிளங்காய்.

இந்தத் திருக்குறள்

தேமாங்காய் - தேமா - புளிமாங்காய் - கூவிளம்

கூவிளங்காய் - தேமா - மலர்

எனும் வாய்பாடில் அமைந்துள்ளது.

இந்தத் திருக்குறளில் மூன்று காய்ச் சீர்கள் உள்ளன. கருவிளங்காய்ச் சீர் மட்டும் இல்லை.

அசைகள் மற்றும் சீர்களைப் பார்த்து விட்டோம் அடுத்த பதிவில்  #தளை பற்றி பார்ப்போம்.

………………..........……………..………………..……